បន្ទាប់ពីឃើញមានបងប្អូនមួយចំនួនរិះគន់ផ្លូវបេតុងដែលមានថ្នេរ កាលពីថ្មីៗនេះនៅលើហ្វេសបុក និងមានអ្នក Comment ជាច្រើនពាក់ព័ន្ធនឹងការជួសជុលផ្លូវមានថ្នេរដែកតាមអារម្មណ៍របស់ខ្លួន ធ្វើឲ្យបងប្រុសម្នាក់ដែលមានឈ្មោះក្នុងហ្វេសបុក Ky Visoth Sambath បានចូលរួមចែករំលែកចំណេះដឹងខ្លះៗដោយគាត់បានរៀបរាប់ថា៖

“ខ្ញុំទេីបតែឃេីញមានការរិះគន់និងងឿងឆ្ងល់មួយចំនួនចំពោះផ្លូវបេតុងដែលមានថ្នេរដែក។ ដូចនេះខ្ញុំសូមចូលរួមចែករំលែកចំណេះដឹងខ្លះៗក្នុងនាមជាពលរដ្ឋមួយរូប។ តាមលក្ខណៈបច្ចេកទេស គេមានវិធីសាស្រ្តច្រេីនក្នុងការជួសជុលផ្លូវបេតុងដែលប្រេះ ហេីយវិធីសាស្រ្តមួយក្នុងចំណោមនោះគឺ ការជួសជុលបេតុងដែលប្រេះដោយប្រេីថ្នេរភ្ជាប់ (Concrete Crack Repair by Stitching)។ វិធីសាស្រ្តថ្នេរភ្ជាប់នេះមានបច្ចេកទេសបីបែបដែលគេនិយមប្រេីគឺមាន ថ្នេរខ្វែង (Cross-stitching), ថ្នេររន្ធ (Slot-stitching),

និងថ្នេររបាររាងU (U-bar stitching)។ ហើយបច្ចេកទេសទីបីនេះ (U-bar stitching) ត្រូវបានប្រេីនៅលើផ្លូវទៅទួលពង្រនេះ គ្រាន់តែគុណភាពការអនុវត្តរបស់យេីងពេលនេះនៅមានកំរឹត។ ជំហាននៃការអនុវត្តវិធីសាស្រ្តនេះគឺ ដំបូងគេឆាបនិងចុះរន្ធសងខាងនៃស្នាមប្រេះ រួចសំអាតរន្ធប្រហោងទាំងនោះ ហេីយគេបាញ់បញ្ចូលសារធាតុបន្ស៊ីរវាងដែកនិងបេតុង (Non-shrink grout or epoxy) រួចដាក់ដែករាង U ចូលរន្ធទាំងនោះ។ មតិយោបល់ផ្ទាល់ខ្លួនរបស់ខ្ញុំចុងក្រោយគឺថា ការឈឺឆ្អាលនិងព្រួយបារម្ភរបស់ប្រជាពលរដ្ឋនោះជាការល្អប្រសេីរ តែសំណូមពរសូមបង្វែរពីការសន្និដ្ឋានដោយខ្វះអំណះអំណាងច្បាស់លាស់ ទៅជាការចោទជាសំនួរឬស្នេីរជាសំណូមពរអោយមានការបកស្រាយច្បាស់លាស់វិញ។

ការសន្និដ្ឋានដោយខ្វះមូលដ្ឋានឬបច្ចេកទេសច្បាស់លាស់នោះនឹងធ្វេីអោយបាត់បង់គុណតំលៃនៃវិស្វករនិងអ្នកបច្ចេកទេសជាតិសាសន៍ខ្លួនឯង ហេីយបេីកឱកាសល្អដល់ជាតិសាសន៍ដទៃ។ យេីងស្រលាញ់ប្រទេសយេីង យេីងចូលរួមចំណែកតាមលទ្ធភាពនិងឯកទេសរៀងៗខ្លួនទាំងអស់គ្នា។ សូមព្រះប្រទានពរដល់ប្រទេសខ្មែរនិងប្រជាជនខ្មែរទាំងអស់គ្នា” ៕ ប្រភព៖ Ky Visoth Sambath